Kamati ya Fedha ya Bunge la Kitaifa inapendekeza Bunge litupilie mbali kifungu cha Mswada wa Fedha wa 2025 ambacho kinalenga kuipa Mamlaka ya kukusanya Ushuru nchini (KRA) mamlaka ya kufikia data ya kibinafsi na ya kifedha ya walipa kodi.

Kifungu cha 52 cha sheria inayopendekezwa kinapendekeza kuondoa Kifungu cha 59A(1B) cha Sheria ya Taratibu za Ushuru, ambacho kinazuia mashirika ya ushuru kama KRA kulazimisha biashara kushiriki data ya kibinafsi ya mteja.

Ikiwa mswada huo utapita utaipa KRA uhuru usio na kikomo wa siri za biashara na data ya kibinafsi kama vile pesa za rununu na miamala ya benki huku mamlaka ikijaribu kuwanasa wakwepaji ushuru. Pendekezo hilo limeibua wasiwasi kuhusu ukiukaji wa faragha, ufuatiliaji unaowezekana na matumizi mabaya ya taarifa.

Katika ripoti yake kuhusu Mswada huo, Kamati ya Fedha inayoongozwa na Mbunge wa Molo Kuria Kimani inabainisha kwamba baada ya kutafakari, ilihitimisha kwamba kifungu hicho “hakikidhi kiwango cha kikatiba kilichowekwa chini ya Kifungu cha 3I(c) na (d) cha Katiba ya Kenya, ambacho kinamhakikishia kila mtu haki ya faragha.”

Imetayrishwa na Maureen Amwai