Mbio za kuwakilisha Kenya katika Michezo ya Viziwi 2025 jijini Tokyo, Japani kuanzia Novemba 15 hadi 26, zilianza Jana kwa majaribio ya kitaifa ya mpira wa vikapu yakileta pamoja kaunti saba katika Uwanja wa USIU.

Majaribio hayo ya siku mbili yanalenga kuchagua wachezaji 20 ambao wataingia kambini kabla ya kujumuishwa katika kikosi cha mwisho cha wachezaji 12 kutoka katika kaunti zinazoshiriki ambazo ni pamoja na Nairobi, Mombasa, Kwale, Nakuru, Kericho, Kisumu, na Nyeri.

Tukio hilo tayari limevutia talanta za kiwango cha juu, huku wachezaji wa kutumainiwa wenye umri wa miaka 17 wakiingia uwanjani, wakiwa na hamu ya kupata nafasi kwenye timu ya taifa.

Kocha wa timu ya taifa ya wanawake ya Kenya, Mary Chepkoi, alielezea kufurahishwa kwake na kiwango cha ushindani na kuibuka kwa talanta mpya.

Katibu Mkuu wa Shirikisho la Mpira wa Kikapu la Viziwi nchini Kenya, Gilbert Ogolla, alikiri changamoto za kuendesha majaribio bila wafadhili kutoka nje, wakitegemea zaidi michango ya wanachama.

Miongoni mwa wanaowania nafasi mjini Tokyo ni Mercy Mideva, kiongozi wa timu kutoka Kajiado ambaye aliwakilisha Kenya kwenye Michezo ya Olimpiki ya Viziwi ya Brazil mwaka wa 2023.

Kenya inaingia kwenye Michezo ya Olimpiki ya Viziwi ya mwaka huu ikiwa na matumaini mapya, baada ya Kamati ya Kimataifa ya Michezo ya Viziwi (ICSD) kuondoa kusimamishwa kwake mapema mwaka huu.

Marufuku hiyo ilikuwa imetolewa kufuatia nchi hiyo kushindwa kupeleka timu kwenye Mashindano ya Dunia ya Mpira wa Mikono ya Viziwi ya 2023 huko Copenhagen na Michezo ya Vijana ya Viziwi ya Dunia ya 2024 huko Sao Paulo.

Kwa sasa, timu ya wanaume ya Kenya imeorodheshwa ya 12 duniani kote, huku upande wa wanawake ikishikilia nafasi ya 9. 

Imetayarishwa na Nelson Andati