Robo fainali za Kombe la Mataifa bingwa barani Afrika, AFCON, zinaanza leo huku mataifa 8 yakipigania nafasi ya kutinga nusu fainali.

Algeria itavaana na Nigeria katika mechi kali, Algeria ikiwa haijapoteza mchezo wowote kwenye mashindano haya na inajivunia safu imara ya ulinzi. Nigeria, kwa upande wake, ina moja ya safu kali zaidi za ushambuliaji, ikiwa miongoni mwa timu zilizofunga mabao mengi zaidi hadi sasa.na ina rekodi nzuri katika hatua ya robo fainali.

Misri itakabiliana na Côte d’Ivoire. Misri, mabingwa mara saba wa AFCON, ina uzoefu mkubwa katika mechi za mwondoano na imekuwa dhabiti kwenye robo fainali. Ivory Coast ni mabingwa watetezi na wanaingia wakiwa na kujiamini, licha ya Misri kuwa na ushindi mwingi zaidi katika mikutano ya awali.

Katika debi ya Afrika Magharibi, Senegal itacheza na Mali. Senegal haijapoteza mechi yoyote na ina rekodi bora dhidi ya Mali, huku Mali wakitegemea ustahimilivu wao.

Wenyeji Morocco watavaana na Cameroon. Morocco inanufaika na faida ya nyumbani, wakati Cameroon, mabingwa mara tano, wanategemea uzoefu wao mkubwa.

Washindi wa mechi hizi watafuzu nusu fainali za AFCON 2025.

Imetayarishwa na Antony Nyongesa