Mshambuliaji wa Ulinzi Starlets, Elizabeth Mideva, ameonyesha dhamira ya dhati ya kunyakua tuzo ya mfungaji bora katika msimu huu wa Ligi Kuu ya Wanawake nchini.

Mideva, aliyewahi kusoma katika Shule ya Upili ya Wasichana ya Bishop Njenga, aliibuka nyota mwishoni mwa wiki alipofunga mabao matatu katika ushindi wa mabao matatu kwa moja dhidi ya mabingwa wa zamani Vihiga Queens, ushindi uliosukuma timu yake hadi nafasi ya pili ikiwa na alama arobaini na saba.

Mabao hayo yamefikisha jumla yake kuwa kumi, mabao mawili nyuma ya kinara Margaret Kunihira wa Police Bullets, huku mwenzake Joy Oriyo akishika nafasi ya tatu kwa mabao tisa.